Ibas ndalani
perjabunna, tuhu mesera pergeluh kalak enda duana. Ombar erpala-pala erlajar
erdakan. Bagepe kujuma, isampatina perbulangenna e aminna la gia ia beluh. Latih
kal akap Ombar ndalani wari-wari si arus erpala-pala guna encariken perpanna
duana. Isuanna Tomat la kena ergana, lacina pe kena meseng piah langa seh
peranin enggo leben mate. Jong sinisuanna pe la mulih modal perban keri pangani
kera. Je nari mulai latih ukur Rambah ngidah-ngidah kecibal geluhna. Emaka
turah atena mekuah ngenehen ndeharana, tapi la belaskenna. Emaka isimbakna
pusuh peratenna, ibuatna usur dalan gelah sirang. Labo min la mehuli ukurna e.
Saja gelah ula mesera akap ndeharaku e, madin me kami sirang gelah jore
pergeluhna mulihken ku jabu mama. Rusur ia merawa-rawa la eteh sebabna. Mamang
ate Ombar ngenehen sikap perbulangenna si enggo lanai bagi sigel-gel e. Lanai
nggit ibabai arih-arih, asal ngerana merampus. Emaka maun-maun, lanai
terkeriken Ombar ukurna e, rusur ia ngadu-ngadu man simetuana kerna pengelako
Rambah si rempet kal lanai bagi sigel-gel e.
“La kal kap
kueteh kai pe salahku man anakndu e bibi, kuidah enggo rusur ia nembeh-nembeh
la lit sebabna.” Bage me nina rusur Ombar ngerana man simetuana e.
“Aku pe
mamang kap ateku ame. Nai-nai nari la pernah ia bage. Patuh kal nge adi isuruh.
Labo ia nggit jungut-jungut tah merawa-rawa.” Bage ngaloi nande Rambah man
permenna e.
“Tuhu kal
katandu enda bi. Tapi adi lit waktundu, reh kam ku sapo kami ah bi. Tah ajarndu
kari begikenna”
“Ue ame yah.
Adi langa kari aku sempat ku rumah kena. Asal jumpa mis kal pagi aku ngerana
man bana. Ras-ras kita ngajarkensa. Sabar-sabari ame ya. Mbera pagi mis erdalan
katanta.”
*****
Ibas sada
wari mulih Rambah ku rumah enggo tengah berngi maba dagingnda alu meget-eget
perban enggo setengah mabuk. E pe ialo-alo Ombar denga nge aminna ceda kal bas
pusuhna.
“Kai nge
ndia sebabna turang maka enggo bage kal pengelakondu? Ija kal janjinta ndube?
Enggo nge masap kerina pusuhndu sigel-gel e?” nina Ombar janahna tangis
ngalo-ngalo perbulangenna e.
“Ngeranai ka
ko je, Parrr ....., parrr ...., adi lanai ko ngasup lawes ko nteh” nina Rambah.
Itayapna ayo ndeharana seh megara. Sengget kal Ombar ngidahsa perbahanenna e.
Emaka keri kal kesabarenna. Perbahan enda denga ia kena pekpek sedekah
perjabunna e. Emaka minter ersikap ia, lawes ku rumah orangtuana. Itadingkenna
perbulangenna e alu pusuh getem. Sepenadingenna, nderkuh kal Rambah. Aminna gia ia lit denga permabukna,
tapi lit denga kesadarenna. Uga maka bage kal kuban carana pesirangsa atena.
Ipekpek-pekpekkenna tanna simarap ndeharan ndube alu megegeh ku batu. Seh maka
luka tanna e.
*****
“Talangi
nande, me langa kena tunduh?” nina Ombar seh kencailebe-lebe rumah orangtuana.
Rembang paksa sie, orangtuana langa tunduh perban ngarihken peberkat ndahi
kerja-kerja pepagi wari.
“Ise ka kin
nuktuki berngi-berngi ah ka e?” nina bapa Mondan nulih kupintun rumahna.
“Bagi sora
si Ombar kuakap e” minter cinder nande Mondan nalangi pintun. Iidahna ombar
enggo cinder ilebe-lebe rumah alu iluh simaler ibas perdempakenna.
“Kurumahken
nakku mari. Engkai kam maka ngandung nakku? Rubat ka kam ras bulangenndu?” iteguna
minter anakna e ku rumah. Iapusina iluhna janah idakepna alu dem kekelengen.
Jenari ibuatna teh, itunggahina man Ombar.
“Kai ka kin
perubaten kena maka minter kal kam lawes kujenda nakku? Lanai nge banci arihi
kena manjar-anjar?”
“Lanai kal
aku ngasup nande ... huu .... uuu ..., emaka enggo me sirang saja kami huu
...... uuu ..., enggo lanai kal kelandu sigelgel e kuakap nande. Lanai banci
jadi teman arih.” Kesi-kesi kal Ombar janahna nuri-nuri.
“e ola bage
nakku, la mehuli bage. Adi enggo erjabu uga pe lit nge siman hadapen. Akap
kalak kami kari la matah ajar nakku. Emaka ukuri simehulina. Enda kin
ipesirang-sirang orangtuana ah kin ningkalak kari. Lanai kal kami pang
ncidahken ayo kami e. Aloken uga litna.” Icubaken bapana ngapuli anakna e.
“Aku ugapa
pe ningen lanai bo ngasup bapa. Kueteh nge aku enggo salah, kusimbak kal
mbarenda kerina ranan ras kata ajarndu duana. Emaka gelah ula akapndu mela
duana, pagi mis lah taruhkenndu aku mulihi berkat ngelajang.”
“Eeeee
...... e ula kal gendek carandu rukur nakku. Meteh lah kam kerna uga kin
turi-turin nggeluh ningen e. Harus panjang perukurenndu, terbeluh ngalaken
kerina perbeben sireh. Sapu tenten e nakku, bagekin nge teman nandena” nina
nandena janah itunggahina ka ulihi teh inemen man anakna e.
“Em, ia
nande-bapa bicara la pe pagi taruhken kena, aku tetap nge berkat. Enggo
kupebulat ukurku.” Minter pajek cinder Ombar, jenari isusunina barang-barangna
guna mis pagi ia lawes nadingken kuta. Sinik nari nge nande ras bapana
ngidahsa. La kal ia beluh duana adi nogan anakna singuda e. Labo min akapna
payo perbahanen anakna e, egia iturutina gelah ula mbagessa ukurna ceda.
*****
Reh pa
canggah kiam-kiam ku kede idapetina je Rambah paksana minem.
“Rambah,
erkai ko ije tenang-tenang e?” kesah-kesahen pa canggah ngerana.
“Kena kai
kin? Kaden kam e, me labo kam iayak-ayak arimo janahndu njujung gagaten e?”
ngaloi rambah janahna engkoyok.
“e nggo mate
kal kita, sanga kita serius e kin pe akapna usur jagar-jagar.”
“Mccckkkk
..., pindo lebe tehndu yah, maka kam ngerana la kuidah kam tenang e.”
“La perlu
nak, ah ayaki lah ndeharam gundari iyah, lawes atena ulihi ngelajang kuidah e
ndai”
“Uga ka
katandu lawes? Toh, nggo bual kam ena.”
“Lalap nge
ia la tek. E denga kal motorna mentas arah kesain. Nce kusungkun turangna si
Mondan. Ia sendiri ndai langsung ngerana ras aku.” Sengget kal Rambah megi
ranan e. Emaka lanai ukurina kai pe. Itinjarna meja kede e. Kiam ia ndarami
motor ku tiga gelah sempat denga jumpa ras ndeharana.
Rembang pe
Juah megi cakap kalak enda, perban ia pe minem ibas kede e. Emaka ia pe mis
ersikap lawes ku tiga. Entah leben kari aku jumpa ras impalku ndai. Nggit pagi
ia mulihi kubaba kujabu nande atena. Emaka enggo radu ia ngayakisa arah dalin
si la seri.
*****
Nusur kenca
Rambah datas motor nari, iidahna bas stasion Bus enggo berangkat. Iayakina
janah ilebuhina bus e. Tapi lanai ibegi, ras enggo tancap gas. Menam bene
pengarapenna, emaka mulihken atena, iputarna daginga e alu lemas. Sengget kal
ia, idahna cinder denga Ombar ras orangtuana nimai antrian keberkaten. Iayakina
alu sisa gegehna si lit. (Rembang paksa sie, nusur Juah bas motor nari. Janah
ilebuhna atena Ombar janah iapna tanna. Tapi la surung babahna erlebuh perban
enggo leben itangkap Rambah duana tan Ombar). Itagangi Rambah duana tan Ombar
alu mekeskes, jenari pinter ia suksuk bagi tempa erjimpuh.
“Ola kala
kam lawes agi kakana, mindo kal aku. La kal aku ngasup sirang ras kam” nina
Rambah janahna tungkuk.
“Enggo me
kaka, bias me kerna arihta. Lanai padah sipegedang.” Nina ombar.
“Mindo maaf
kal aku agi. Erjanji aku lanai kal kuulihi lagungku si la payo e. Situhuna la
terbaba aku ukurku ngidah situasi geluhta e agi. Mekuah ateku ngenehen kam
silatih ras bas la ngasupndu e pe lalap ipengasupndu. Iba ukurku, emaka kuban
lagu langkahku si la mehuli gelahna itadingkenndu aku. Gelah ulanai nanamindu
geluh mesera ras aku ateku. Tapi tendingku e la kepe ngasup isirangken ras
pertendinndu si dem kal kekelengen e.”
“Gel-gel uga
maka la turikenndu kerna sie kaka? Aminna uga pe serana, kugengken min ndai ras
kam. Tapi gundari enggo melawensa turang. Emaka pulahind perban ugapa pe aku
enggo bulat ukurku mulihi ngelajang bana.”
“Lawes pe
kam labo min dalih agi, saja langa bo kupulahi tanndu e adi langa ialemindu
perbahanenku e. Gelahna bekas penadingkenndu e la gia kari, la putik permelusna
rudang sinisuanndu ndube. Tapi permelusna e min perban lanai ipaleri lau
kekelengenndu. Mbera pagi radu ras tendiku e ikut ibaba rudang si melus e.”
“Cinder kam
lebe kaka” nina Ombar janah iteguna duana tan Rambah si encikep tanna e alu
megegeh. “Adi perbahan aku lawes maka melus rudang e, la padah nari aku lawes
kaka. Tapi kupindo bandu, ulanai pagi ipenartarndu aminna bulungna pe. Gelah
pagi lalap mejile tatapen, kekelengenku pagi silalap maler arah uratna e.”
S E L E S A I
0 komentar:
Posting Komentar