Pas mentasi
mbalmbal perjalangen, lit rempet sinarik tan Rambah ku duru dalan. Sengget kal
ia, menam-menam celus. Tapi minter ka nge itangkap sinariksa ndai, ipecinderna
seh maka ia sitatapen. La terturiken riahna ukur Rambah natap ise si
ilebe-lebena cinder. Ranjak-ranjak ia, idakepina mis.
“Ula bage bang,
duru dalan e. Mela bage, mereha kari akap singidah-ngidah.” Pelepas Ombar tan
Rambah ibas dakepen nari. Aminna situhuna ia pe sampur akapna pendakep atena
jadi e. Tapi tertahankenna denga perban ietehna ija inganna duana ngadi e.
Emaka kundul ia duana itengah mbal-mbal e. Ipudikenna kempak dalan.
“Ndiganai sikena
mulih nande tiganku? Enggo kap menam-menam kerah bulung-bulung ikerangen ndube
aku nimaisa.” Nina Rambah menaken cakap.
“Enggo dua wari
kaka. Saja labo surung melus rudang-rudang sikusuan ndube. Eme dalanna senang
pusuhku dingen aru ateku banci denga kita jumpa pedempak ayo bagenda turang”
“Ija kin ndube
suanndu rudang e maka langa melus bagenda enggo dekahna?”
“ibas pusuhndu
kaka. Tersungkun aku man Unjuk, langa kepe kam njabuken bana. La kepe mosar
pudunta ndube.”
*****
Pas mulih i tiga
nari, mentas motor bapa Mondan arah mbalmbal e. Tek la tek ia ngidah anakna ras
sekalak dilaki kundul-kundul i tengah mbal-mbal e. ipemanjarna motorna e,
penusurna kacana. Je nari tancap gas ia ku rumah. Ipenna mekeskes.
*****
“Jadi, uga nge
ndia sibahan kerna arih-arihta si lolo ndube agi? Me sipersada nge arih-arihta
e?” nina Rambah ngumputi percakapenna e.
“Surung kaka,
erjabu kita. Man bandu kal pagi aku. Ulanai sipedekah-dekah.”
“Egia uga kin
nina mama ras mami? Senang kin kari ia adi bagi aku kela na? Pendahinku pe
kujuma-kurumah ngenca agi.”
“Adi tuhu kin
atendu keleng aku kaka, pagi nusur-nusur matawari reh kam ku rumah. Ngerana kam
ras nande bagepe bapa kerna sura-suranta e.” Nina Ombar rikutken tungkuk kal
ia.
“Lit kin lah
serpang dalan siman bentasenku erjingkang ku rumah mama ras mami agi?”
“Uga pe pagi
kitikna serpang siman bentasen e kaka, pala-palaindu kal erjingkang. Keri kam
pagi la ngasupna, kutegu pagi kam gelah seh kujabu nande ras bapa”
Wari ndabuh ku gelapna.
Permakan pe ngadi ngembus surdamna. Gera na lembu ras kerbona mulih ku rumah.
Pet-pet pe enggo silebuh-lebuhen, naruhken wari ke berngina. Emaka sirang mulih
kalak enda duana imbal-mbal e nari.
*****
Bas rumah bapa
Mondan, terbegi sora gejek. Kepe bapa Mondan enggo jungut perban ngidah Ombar
ras Rambah ibas mbal-mbal arih-arih.
“Enam nande
Mondan, bekas peasi-asindu ndube. Enggo salah perdalan anakndu ah” nina bapa
Mondan alu sora si megang.
“Uga ka salah
perdalan anakta e bapa Mondan?”
“Uga, uga nindu
je. Ndai kuidah si Ombar dua-dua kundul ibas mbal-mbal ah arih-arih. Rapat ka
perkundulna e.”
“Entah e kin
teman-temanna bapa Mondan?”
“Teman-teman
nindu? Aku la setuju! Me idahndu nge uga pergeluh Rambah? Enggo ka mesera,
pendahinna ka pe labo lit. Sekolahna pe labo meganjang. Rumahna pe atap rumbia.
Uga nina anakta si Ombar kari banci senang ras dame adi ras ia? Si labo tuhu
adi kalak enda erdemu nande Mondan. La seri kegeluhenta ras kegeluhenna.”
“Payo katandu e
bapa Mondan, tapi manjar-anjar kita ngerana man Ombar gelah begikenna.”
“Lalap kam ngata
manjar-anjar. Tapila enggo bengket kata ajar man bana.”
Sempat terbegi
Ombar sitik percakapen nande-bapana pas italangina atena pintun muat ku rumah.
Emaka bagi si mbiar ia nalangi pintu rumahna. Entah merawa nge kari bapa ras
nande nangdangi aku atena.
Kenca talangi
Ombar pintu, janah masuk ia ku bas rumah,
“Mari lebe nakku
Ombar!!!” nina bapana erlebuh
“Sekale saja
nakku toh, man kam lebe” minter ipotong nandena cakap bapana e.
“Ue nande” Pinter
kal mis ombar ku ruang makan.
“Manjar-anjar
bapa Mondan, lit nge kari kerina layasna. Pesursur lebe rampusndu maka ngerana.
Lanai kari teralo-alo anakta cakapndu e adi paksana kam merawa.” Ipeteneng
nande Mondan perbulangenna e. Idabuhken bapa Modan batang dagingna ku kursi.
Itarikna kesahna mbages-mbages. Jenari pinter ia lawes ku kamarna.
*****
Pepagi warina,
enggo agakna berngi, ipala-palai Rambah reh ku rumah orang tua Ombar e. Sikap
banna peruisna, ibabana luahna roti kering siitukurna i kede bas kuta e. Ituktukina
pintu rumah bapa Mondan janahna erlebuh.
“Rumah kang kam
mama, mami???” ngelebuh arah darat nari. Emaka italangi nande Mondan pintun,
sengget ia ngidah Rambah enggo pajek cinder ilebe-lebe rumahna.
“Eh, kam ka nge
Rambah, kai ka kin ndai atendu sekalenda maka reh ku rumah kami enda?” nungkun
nande Mondan janahna ngincum.
“Banci aku kubas
mami?”
“Kubasken yah,
saja ula banndu melket lantai keramik rumah kami enda.”erdejep kal pusuh Rambah
megi-megi ranan nande Mondan e. Masuk ia ku ruang tamu, enggo idapetina je bapa
Mondan ras si Mondan sangana ercakap-cakap.
“Eh, engko makana
pang ka ko masuk ku rumah kami enda? Kai kal leginmu sekalenda nak? Lalit
penukur berasmu, ngata ko” nina kata pengalo-ngalo bapa Mondan ngidah kerehen
Rambah. Ombar megi-megi arah ruang makan nari sedak kal akapna. Piahna la
gejapna teriluh kal ia. Erkadiola bas pusuhna nuruh Rambah reh ku rumahna
perban cakap pengalo-ngalo si la sikap bas keluargana nari.
“Labo ma,
ercakap-cakap nge ndai ateku kujenda”
“maka babam ka
plastik. Me beras nge atem?”
“Enda ndai luahku
nge kujenda ma” iamparken Rambah kumeja luah sibabana e. Itungkir bapa Mondan
luahna e.
“Kai kin e?
Hehhh, jabu kami enda nakan kucing ngenca e nak. Jadi adi la tertukurmu luah,
la padah petempa-tempa. Minter saja ko ngerana yah, kai kin ndai atem?”
“Bbbbag...genda
mm...ma, ngerana-ngerana kami nderbih ras anakndu si Ombar. Reh kam ku jabu
nande-ras bapa, gelah sicakapken ppppp per jjj....jabbunta nnnninnnaa mmmaaa
...” retap-retap pengerana Rambah perban enggo mulai sedak akapna ngalo-ngalo
ranan keluarga bapa Mondan e. Cinder minter bapa Mondan, megara mbiring ayona,
njerleng Rambah. Tungkuk naring Rambah, la ia pang natap ayona.
“Kai nim?” itarik
bapa Mondan kerahung baju Rambah, ngikut cinder ka pe Rambah perban itarik
bajuna. “Ciuhhh” cidurina ayo Rambah.
“Ula suram
erjingkang ku jabu kami guna ngempoi anakku adi bagi pergeluhmu e. Lalit dalan
anakku banci senang geluhna rang engko. Tandai bam, la lah ko mela pe merjat
rumahku e. Lawes ko gundari sope langa naik pitamku.” Itungutken bapa Mondan
Rambah seh ia ndabuh ku lantai. Iluhna maler. Icinderkena, jenari lanai ia
nulih. Pinter ia lawes rumah e nari alu pusuh sigetem ras iluhna la
erngadi-ngadi. Iayaki Ombar ia ndarat janah ilebuhina alu sorana sikitik perban
ia pe ikut tangis. La ibegikenna nari sora e. Lalap iayaki Ombar ia seh tengah
kesain. Bapa ras nande bagepe Mondan ngikut-ngikut arah pudi atena ngayaki
anakna Ombar si lanai erturi-turin perkiamna.
“Mari anakku,
labo man ayaken jelma musil ah. Lit denga impalndu simerupan asangken ia.” Nina
bapana. Mamang ate jelma sinterem perban gejek tengah kesain e. Pas ideher
jambur, pekeri Ombar sorana ngelebuhsa.
“Kaka, adi kin
iteruskenndu. Sahun me bas piso enda pengadi-ngadin kesahku e.” Nina ombar,
obas tanna enggo taganga piso si enggo ngala ku urat darehna. Siapkenna alu
keskes tanna guna nayat urat darehna e. Minter ngadi jingkang Rambah, nulih ia
ku pudi. Natap ia kempak atena jadi e alu iluh si enggo ngelitapi ayona.
“Nakku, ola
lakoken e nakku.” Nina nande Mondan ngidah pengelako anakna e. Jengang naring
bapana rikut pe Mondan natap-natapsa. Lanai ia beluh ngerana. Jelma enggo
rulung kerina itengah kesain ngenehen kai maka gejek. La ibegiken Ombar ranan
nandena e, tapi matana lalap ngenehen man Rambah.
“Mari kaka,
deheri kempak aku. Pulahi piso ibas tanku e adi tuhu kin atendu keleng aku.
Labo pediatndu aku mate.” Erdalan manjar-anjar Rambah ndeheri Ombar. La ia
ngerana, ibuatna piso e janah ibenterkenna. Minter idakepi Ombar ia. Lanai
tehna mela. Arah pudi-pudi jelma sinterem e teridah nungkuk Juah perban ceda
kal atena perban pusuh impalna enggo sideban punana. Tapi sie kerina ipediatna
gelah senang pusuh impalna e, ia pe enggo meriah ukurna.
“Lalit sibanci
nirangken kita kaka. Baba aku kujape kam lawes.” Megogo kal ate bapa Mondan
ngidah-ngidah anakna e. La kepe iarapna, perbahanenna e erbahanca anakna banci
munuh bana. Emaka dungna ipedalanna sura-sura Ombar erjabu.
*****
Bersambung ...
Learn the Baccarat rules - febcasino.com
BalasHapusIn a game that features a huge jackpot, you will receive a bonus. หาเงินออนไลน์ There worrione are no 바카라사이트 bonuses. The bet is placed on the bet slip and you need to wager the money