PART II
Nusur-nusur
matawari enggo reh-en sangkep nggeluh ku jabu bapa Mondan. Guna ngalo-ngalo
kemulihen Ombar. Minter erdakan bibi-bengkilana ku dapur. Ipotong me manuk man
bengkau berngi. La ketadingen pe impal Ombar enggo sikap peruisna kujabu mamana
e. Pulung meriah irumah keluarga e.
Mentas
Rambah mulih juma nari, mamang atena enterem pulung jelma irumah bapa Mondan e.
Enggo nge ndia mulih tambaten pusuhku ndube atena. La gejapna tertumburna
gereta lembu singadi itepi dalan. Ndabuh cangkul sipersanna perbahan sengget.
Cirem-cirem kalak ngidahsa. Mela akapna, emaka meter jingkangna nahena gelah
pedas seh irumah.
*****
Elah kenca
man berngi, janah aleng-aleng man pe enggo dung iburihi, mulihen sada-sada
sangkep nggeluh bapa Mondan. Tading me keluarga bapa Mondan ras Turang bagepe
silih ras beberena Juah. Pulung rembak ia kerina guna ercakap-cakap.
“Me
Mejuah-juah kegeluhenndu dekah erlajang permen bibina?” nina nande Juah menaken
cakap.
“Mejuah-juah
bi, kena gia me labo lit sirongketna sedekah enda?” ngaloi Ombar
“Lang
permen, ate kami tedeh e ngenca rongketna. Emaka minter kal kami reh begi kami
berita kam mulih.”
“Enda menggo
kita jumpa bi, me enggo malem tedehta e”
“Aloi sekali
impalmu e Juah, sinik ko lalap.” Tungkuk mela si Juah megi ranan nandena.
Sambar-sambar ayona perban melana.
“Ue bebere
mamana, ban sitik katandu tandana enggo jumpa ras impalndu e” nina bapa Mondan
naling ranan turangna e. Reh melana Juah.
“U...ue m
.... ma ...” nina Juah retap-retap pengeranana.
“Labo man
bangku man katanken, impalndu ena lah cakapi” nina pa Mondan
“Ue, kai kin
kemelan adi man impalna ngerana? Adi gel-gel pe ras nge kena lalap jagar-jagar.”
Nambahi penaling nande Mondan.
Gedang menda
percakapen keluarga e. Janah ersura-sura keluarga bapa mondan ras keluarga bapa
Juah gelah ipejabu menda Ombar ras Juah. Isungkun Juah enggo erpengue, tapi
isungkun Ombar langa erpengue. Emaka berngi e langa kuh percakapen perjabun e.
Kenca lawes
keluarga bapa Juah minter kal isungkuni nande ras bapa Mondan anakna Ombar e.
“Kai
kurangna impalmu ah Ombar? Adi kerna merandal nim merandal kal nge, labo nggit
nogan. Merupa nim merupa ka nge. Perpangkat nim, perpangkat kal. Apai kin
idahko anak perana bagi impalmu ah ikuta enda lit bagi pendahin impalmu ah?”
nina nande Mondan ngorati Ombar.
“Labo lit
kurangna nande.”
“Jadi kai
nari timanndu ame” nina bapana.
“Tapi lit
kap ateku jadi si enggo erpadan ndube kami ersada bapa”
“Ise ka kin
e Ombar? Makana ngasup kal kam ngelokken impalndu. Sembaba lah geluhna ras
geluhta ame?”
“Jelmana
labo merupa nande-bapa, labo perpangkat. Tapi kekelengenku ras kekelengenna e
enggo ersada. Janah lanai bo terpesirang.”
“Ise kin
jelmana? Maka sempat lanai terpesirang nindu ka. La kin lah enggo kam iguruina
salu rimo mukur maka man kalak mesera ka ukurndu leket?” nina bapa Mondan alu
megang sorana perban enggo mulai kumat tensina ngenehen Ombar silalap mesikel
ngata lahang man impalna ndube. Kiam minter Ombar ku kamarna, ierukna pintunna.
Kesi-kesi ia ngandung ibas kamarna e. Ceda kal atena perban lanai akapna jaman
siti nurbaya, ijodoh-jodohken anak.
“Manjar-anjar
bapa mondan. Ula kam leben merampus. Sakit kam kari bapa Mondan. Anakta e pe
kari mbiar nuriken kerna uga kin sura-surana e. Sapu ten-ten e turang.” Minter
kal ipeteneng nande Mondan perbulangenna e.
“Bagem kam
usur nande Mondan, ikapitindu usur erbanca ia manja. Piahna rate-ate lalap.
Lanai bengket kata ajar simehuli e pe man bana. Guna masa depanna simehuli nge
ate. Gelah jore pergeluhna ate.”
“Labo
turang, adi manje-anje kita ngerana, begikenna nge kari dungna. Ula kin leben
kita merampus. Mbiar kari anakta e ngenehen kita. Langa nge mbelin perukurenna
ateta saja turang. Gelah ula latih siakapa rukur. Minem kam lebe yah.”
Itunggahi nande Mondan lau meciho man perbulangenna e.
*****
Terang kenca
wari, mis isikapi Rambah perkakasna ras perpan cigerna erdahin ku sabah. Jenari
pinter ia berkat. Pas mentasi rumah Ombar erdejep kal jantung. Saja
ipapa-palaina erjingkang alu semalna. Tempa lalit kai pe ukurenna. La itehna
nungkir Ombar arah jendela kamarna paksa ia lewat ndube. Rukur-rukur ombar uga
nge dalanna maka banci jumpa ras Rambah perban enggo mesikel kal ia nangdangi
tambaten pusuhna e.
*****
“Nande, aku
ndarat lebe ya, jumpa ateku ras teman-temanku sanga karang taruna aku
mbarenda.” Nina ombar man nandena enggo kenca ia dung ridi ras peruisna pe
sikap.
“Ula kam
ndauh-ndauhsa ya nakku. Gelah la akap latih ndaramisa kune perlu kari kami.”
“Ue nande,
labo aku ndauh.” Minter ia berkat niar-niari kuta e. Tepetna rumah Unjuk si kin
temanna meriah kal paksa mbarenda ia ikuta ras-ras ibas karang taruna bage pe
teman sekolah.
“Unjuk,unjuk,
rumah kang kam nak?” nina Ombar ngelebuhi kenca ia seh i lebe rumah temanna e.
“Ise?” nina
ngaloi bas rumah nari janah nalangi pintun. Idahna enggo cinder ilebe rumahna
teman ndeherna si enggo ndekah la jumpa.
“Ombar
...!!!” nina, minter ia sidakepen duana. Cirem janah tawa ia duana peburo atena
tedeh.
“ku rumah
mari nak we,” itegu Unjuk mis Ombar ku bas rumahna.
“Kundulken
nak yah, ntaku ban lebe teh ta”
“La padah we
yah, langa bo aku muas. Ngerana-ngerana saja kita ya.” Itarik Ombar tan Unjuk
gelah kundul saja ia duana.
“Ndiganai
kam seh we, maka la kal kam ngata mulih?” nina unjuk mbuka ranan.
“Nderbi we,
saja perban enggo agakna ben emaka lanai aku ndarat.”
“Ence kai
babandu luahndu we?”
“Reh kam
kari ku rumah nak we ya. La terkanting aku ban buena.” Nina Ombar erguro.
Meriah bualan duana. Dungna seh me cakapna kerna dilaki siatena jadi.
“Egia uga
gundari bang Rambah nak? Enggo tedeh kal ateku ia?”
“Mbarenda
sanga kam lawes ndai, sempat ka nge ia rusur lolah. Tapi reh dekahna, enggo ka
me dahikenna dahinna bagi semalna nak.”
“Egia la kin
lit itehndu teman-temanna sideban selain aku nak? Tah enggo kin ngobah ukur
mama biringku ndube ateku. Lit ka nge per aruna ukurku e.”
“Adi
sikuetehna labo lit nak. Adi anak perana kutanta enda, ia ngenca la pernah
kuidah kelis. La ku juma ku sabah, la ku sabah ku juma. Bage-bage saja ngenca
lalap dahinna nak we. Emaka adi kerna sie, kerina nge kuakap anak kuta enda
meteh adi ia sisada denga asa gundari.”
“Berarti
setia denga nge kap abang ah nangdangi aku e me nak we?”
“Setia kal
nak. Emaka labo kam salah pilih adi ningku.”
“Ku jumpai
kal ateku bang Rambah ndai pe nak we. Temani sitik kari aku ya.”
“Labo ka man
temanen we, jadi simekpek rengit kena ka kari aku je?”
*****
Dung ridi
karaben, peruisna pe enggo sikap, cirem-cirem Rambah ndarat rumah nari. Atena
lawes ku kede. Labo tehna kai sendah si jadi can. Tapi bagi simeriah kin reh
bas pusuhna nari.
“Kuja ka
atendu e Rambah? Kuidah cirem-cirem kam e. Man kam lebe nakku.” Nina nandena
rikut ras kemamangen ngenehen anakna la bagi biasana.
“Sekale
nande yah. Mulih kari aku darat nari. Nakan ciger ndai pe bias denga nungkat
beltek e.” Minter ia ndarat.
“Iyo’oh. Aku
di anakku enda ari.” Meleng-eleng takal nandena ngenehen perlagu Rambah si la
bagi biasana e.
*****
Bersambung ...
0 komentar:
Posting Komentar