Agape Timotius Sembiring
PART I
Kenca sada
minggu dekahna Ombar lawes nadingken kuta, rusur kal Rambah teridah lolah
sisada. La i rumah, juma entahpe kede. La gejapna maun-maun enggo tading sisada ia kundul bas kede ban enggo mbages berngi e.
Ibas sada
berngi, perban la siat pusuh Ombar nginget atena jadi ikuta, italangina jendela
kamarna. Itatapna bulan meganjang seh kal terangna. Bage ka pe Rambah, tempa
igejapkenna pusuh si Ombar erlebuh man bana. Teringet me ia kerna arih-arihna
sope persirang-sirangenna muat berkat Ombar ndube ku Jakarta.
“Inget kal
pagi janjinta agi, ula kal pagi lupakenndu aku ertima ikuta.” Bage nina Rambah
janah icikepna meteguh tan Ombar
“Ue kaka, la
pagi sempat melus bulung-bulung ikerangen, labo meruntuh deleng meratah, lalap
pagi kuinget padan ni pudunta duana.” Naktaken iluh Ombar, bagi tempa simesera
akapna ngerana
“Adi tedeh
pagi atendu aku agi, tatap pagi ku langit meganjang. Kune la siat pagi pusuhndu
ngingetsa aku, bulan meganjang ingan matanta erdemu”
“Berkat dage
aku kaka” Sidakeppen ia duana janahna ngandung. Pekerina sampur tedeh dingen
kegogon bas pusuhna duana.
*****
“Erkai ka ko
lolah-loah nungkat isang ka je Rambah? Atek ka bagi perik lumben perban enggo
dung peranin ko idah pe. Loyo, hahahahaha ....” Nina Pa Canggah janah mekpek
bara Rambah. Sengget kal ia perban paksana kal ia lolah terbayang-bayang
nangdangi Ombar siatena jadi e.
“Menam ka
bene jantungku ban senggetna, pa”
“E kin maka
ola dekahen lolah, kuidah kenca ame ah lawes erlajang lalit tempa semangatndu
erkai pe. Ola kari kertang kam ngukurisa. Adi kertang kam pagi pas ia mulih
kiam nge kap ia peh. Kirana kam kari biang pernantin. Kertang bang megegeh man.
hahahahaha”
“Kam tambah
lalap banndu kuan-kuan e, pa. Lit lalap, dua mberngi perbulan, erbi juhar, enda
pernantin, pagi tah kai ka” nina Rambah janahna cirem-cirem megi Pa Canggah
sirusur kal erban pertawan. La ijuma, ikede tah pe i jambur. Melala rusur
bahanna kuan-kuan.
“Bagena lah.
Adi cirem-cirem kam me tambah sitik semangatta ngidahsa. Ula bagi si Pola ah,
ciremna ka pe cirem lembu, langa ia cirem langa erlumba kiam singuda-nguda e”
“Maka ku aku
ka kiamna pa?” nina si Pola perban kena akapna batuna itokohi Pa Canggah e.
Tawa sada kede megi-megi cakap bual pa Canggah. Piah la gejap enggo mbages
berngi. Mulih ka ia nepet rumahna sekalak-sekalak.
Berngi
tambah bagesna, tapi Rambah lalap la banci tunduh. Tayang-tayangkenna lalap
mesikel pusuhna. Piahna kundul ia. Ibuatna Surdamna je nari isempulna. Sorana
melenget meriso. Mabai bana pertabehna medem kalak si enggo tertunduh.
*****
Angin erpagi-pagi
simbergeh e rembus ku ayo Ombar. Erbahanca ia termedak. La iarapna kepeken
tertunduh ia ibas jendela rumah kontrakenna e. Minter ia ridi ras ersikap lawes
erdahin.
*****
Tande
tahunna lima, mulih me Ombar ku kuta. Ialo-alo orang tuana ia ku medan. Bas
perdalanen nangdangi seh kuta, erdegup la erturi-turin pusuh Ombar. Uga nge
ndia Mama Biringku ndube atena. Ibentasina sabah Rambah minter talangina kaca
motor, itatapna. Idahna denga Rambah ngembaki sabah e sisada. Meriah ukurna,
cirem-cirem ia. Sisada denga kepe mama biringku ndai atena.
*****
“Kuja atendu
e nakku?” Nina ame Mondan, ngidah Ombar si minter atena lawes kenca dung nusuni
barang kenca seh irumah.
“Njumpai
teman-temanku nande” nina Ombar ngaloi
“La banci
bage ame, ngadi lebe kita, ngerana kita lebe. E denga kita jumpa pe mis ka
atendu lawes.” Nina pa Mondan.
“Ola bage
nakku, ras kaka tuandu pe kam langa jumpa. La nge atendu tedeh isi jabu enda?
Impalndu ras bibi bengkilandu pe enggo tenahken gelah reh ia tik nari. Emaka
kem kam lebe je.” Nina ame Mondan ka ngatusi kata pa Mondan. Tungkuk naring
Ombar megi cakap nande-bapana e. Minter ia kundul.
*****
Bersambung ....
0 komentar:
Posting Komentar